Gaston Febus e lo Libe de la caça

Partatjar Ficas 5Istòria - Las figuras bèras e los personatges de l’istòria

Gaston Febus (1331-1391) estoc lo onzau Comte de Foish e Vescomte de Bearn. Neishoc a Ortés o a Foish e establishcoc ua rica cort a Ortés dont las esplendors e la sofisticacion estón raportadas per Joan Froissart dins las suas Cronicas de cap tà 1380.

Gaston Febus descriu los sons centres d’interés, atau dins lo prològue deu Libe de la caça :

« Jo, Gaston(…)me soi delectat especiaument de tres causas : las armas, l’amor e la caça ». Prenguèva la caça fòrça au seriós, en li conferar vertuts a l’encòp fisicas e espiritualas. Considerava la caça coma un espòrt airejat que permetèva de demorar en santat mes longtemps. Pensava tanben qu’un bon crestian se devèva ocupar utilament entà anar au paradís. Consacrava fòrça temps a la caça e avèva mes de mila siès cents canhs de caça e dus cents chivaus ! Aqueth valent guerrièr avèva lo gost deu dangèr e aimava caçar los bèths gibièrs coma lo cèrvi, lo bocardon o lo pòrc-sanglar. Cacèc tota la sua vita e òm dit que morishcoc d’ua ataca en se lavar las mans en tornar d’ua caça a l’ors.

Entreprengoc de redigir, entre 1387 e 1391, un tractat sus l’art de la caça. Dediquèc aqueth libe a Felip lo Hardit, Duc de Borgonha. Aqueth tractat estoc utilizat peus adèptes de l’art cinegetic dinc a la fin deu sègle XVIau, e lo son succès estoc relançat gràcia a las debutas de l’imprimeria. Serà enqüèra utilizat a la debuta deu sègle XVIIIau.

Aqueth libe ei un manuscrit, Gaston Febus causishcoc de tractar de catòrze bèstias que los canhs aimavan caçar : lo cèrvi, lo rène, lo dam, lo boc, lo cabiròu, la lèbe, lo lapin, l’ors, lo pòrc-sanglar, lo lop, lo rainard, lo taishon, lo gat sauvatge e la loira. Veng après, ua partida consacrada aus canhs de caça. Las duas prumèras partidas son donc exemples de tractats de naturalisma.

Totes los autes aspèctes de la caça son tractats : las diferentas estapas de la carrièra de caçaire, las armas e tecnicas de caça. I a tanben ua partida consacrada a la medecina veterinària. Se pòt tanben trobar dins lo libe conselhs de caça entaus senhors los mens rics.

Auèi, òm pòt véser paginas deu manuscrit dins diferents musèus dins lo monde e en França, au castèth de Pau, a la bibliotèca Inguembertine a Carpentràs o a la bibliotèca municipala de Lion. La colleccion la mes importanta ei a la bibliotèca nacionala de França.

http://expositions.bnf.fr/phebus/index.htm

http://www.dailymotion.com/video/xgbip0_le-livre-de-chasse-de-gaston-phebus_sport

http://graphikdesigns.free.fr/gaston-febus-phebus.html

http://www.cndp.fr/crdp-toulouse/IMG/pdf/Gastonfebus-dossier_accompagnement.pdf

Frisa cronologica

Questions

Quina ei la diferéncia entre un libe e un manuscrit ?
Quin adjectiu ei utilizat entà tot çò que se rapòrta a la caça ?
Quinas espécias de bèstias èran consideradas coma gibièr ?
Pòdes citar las diferentas partidas deu Libe de la caça ?
Lo Libe de la caça estoc un succès ?

Activitats

Pòdes trobar coma s’apèran aqueras bèstias en occitan auèi ?
Rangier, dain, chevrel, regnart, chat, blariau
Vertat o Faus ?
1. Gaston Febus neishoc a Foish.
2. Gaston Febus demorava en Bearn.
3. Gaston Febus caçava entà se neurir.
4. Gaston Febus escrivoc lo Libe de la caça.
5. Gaston Febus èra crestian.