Contèxte istoric

èm au còr de la Guèrra de Cent Ans (1337-1453) qu’opausava los franceses aus angleses. Aquera guèrra de territòri, o meslèu aquera seria de batalhas, s’ei debanada dins l’oèst e lo sud-oèst de la França.

Edoard de Woodstosck, dit lo Princi Negre, (1330-1376) :

èra lo hilh ainat d’Edoard III d’Anglatèrra. Son chafre, que n’apareishcoc que dus sègles après la sua mòrt, vengueré de l’armadura negra qu’auré portat mès tanben de la negror de la sua amna. N’a pas que setze ans entau son prumèr bèth hèit d’armas, joguèc un ròtle important dins la des.hèita deus franceses a la batalha de Crécy. Estoc en seguida lo representant deu rei d’Anglatèrra en Aquitània ont demorèc dambe la sua hemna, Joana de Kent. Amièc dins la sua cort de Bordèu un faste deus bèths.

Duas cavalcadas memorablas

La prumèra se passèc en 1355. Edoard de Woodstosck arribèc a Bordèu lo 20 de setème dambe 1500 òmes d’arma e 11 000 arquèrs. Lancèc ua cavalcada que degun n’avèva prevista lo 5 d’octòbre, traversèc l’Astarac, l’Armanhac, Tolosa, lo Lengadòc e s’arrestèc a Narbona. Aquera expedicion n’a pas coma tòca de hèr mes bèth lo territòri mès prumèr de cométer fòrça pilhatges suu son passatge. Tornarà a Nadau e escriurà au son pair que la mission ei acomplida.

En març e abriu de 1356, reunishcoc 9000 òmes a La Reula, en tot hèr créser au rei de França ua novèla expedicion en Lengadòc. Mès se’n va e desbarata lo Peirigòrd, ua part deu Lemosin e deu Berrí, de la Solonha e de la Torèna entà arribar finalament a Peitius, que serà lo lòc d’ua grana batalha. Lo 19 de setème, de 6 oras a miègjorn, la batalha herà caíger 8000 òmes d’arma costat francés quan los angleses ne perden que 1900 òmes e 1500 arquèrs. Lo rei de França Joan lo Bon ei hèit presonèr e Edoard III d’Anglatèrra exigirà quate millions d’escuts d’aur de rançon entà la sua liberacion.

Lo 19 de julhet de 1362, Edoard III d’Anglatèrra recampa totas las suas possessions deu sud-oèst en ua principautat d’Aquitània que hisa au son hilh lo Princi Negre. L’Aquitània ganha alavetz ua mena d’autonomia que durarà dinc a 1369 quan Carles V, après un procès, prononcia la confiscacion de l’Aquitània que torna estar un ducat.

En 1371, Edoard de Woodstosck, malaut, herà los sons adius à Bordèu entà tornar en Anglatèrra. I morirà en 1376.

Sus la guèrra de Cent Ans  :

https://fr.vikidia.org/wiki/Guerre_de_Cent_Ans

http://soutien67.free.fr/histoire/pages/moyen_age/guerre_de_100_ans.htm

http://www.maprimaire.fr/pages/histoire/la_guerre_de_cent_ans.php

Suu Princi Negre :

http://chrisagde.free.fr/valdirects/ch5hommes.php3?page=2

http://www.associationlagardere.com/princenoir.htm

http://www.aquitaineonline.com/tourisme-sud-ouest/histoire-traditions/edouard-le-prince-noir-daquitaine.html

http://www.couleur-lauragais.fr/pages/journaux/2002/cl48/prince_noir.htm