Tha am Mòd Nàiseanta Rìoghail air a chur air dòigh leis a’ Chomunn Ghàidhealach. Chaidh am buidheann seo a stèidheachadh anns an Òban ann an 1891 agus ’s i a’ Bhanrigh an neach-taice oifigeil aca.

Tha Mòd air a bhith ann a h-uile bliadhna ach a-mhàin tro bhliadhnaichean a’ Chiad ’s an Dàrna Cogaidh.

Ged is ann stèidhichte air farpaisean a tha am Mòd, bidh gu leòr eile a’ tachairt aig ‘iomall’ a’ Mhòid, far an cluinnear sàr luchd-ciùil agus sheinneadairean Gàidhlig a h-uile bliadhna.

Tha am Mòd cuideachd na chothrom do Ghàidheil ’s do Ghoill coinneachadh gach bliadhna airson seann chàirdeas a dhaingneachadh agus dàimhean ùra a neartachadh.

Tha cuid dhiubhsan a bha soirbheachail aig Mòdan a dh’fhalbh air fàs gu math ainmeil ann an saoghal a’ chiùil. Ann an 1955, bhuannaich Calum Ceanadach am Bonn Òir, agus tha mòran fhathast dhen bheachd gur e fear de na seinneadairean as fheàrr a bha a-riamh ann an saoghal na Gàidhlig. ’S ann à Sgìre nan Loch ann an Leòdhas a bha ‘An Ceanadach’, mar a b’ fheàrr a dh’aithnichear e. Gach bliadhna tha fireannach agus boireannach a’ togail a’ phrìomh urraim a tha seo.

Tha còisirean bho air feadh Alba, agus uaireannan nas fhaide air falbh, a’ frithealadh a’ Mhòid. Tha na còisirean a’ cur seachad fad na bliadhna ag ionnsachadh nan òran aca agus tha dàimh làidir aig na buill ri chèile. Tha farpaisean a’ Mhòid a’ tighinn gu crìch air feasgar Dihaoine le prìomh fharpais nan còisirean, Sgiath MhicShimidh agus Thulaich Bhàrdainn, ach bidh cèilidhean agus cruinneachaidhean a’ dol fada às dèidh do na farpaisean tighinn gu crìch.