La crotz occitana

Partatjar Ficas 38Sciéncias e tecnicas - Tecnicas

La crotz occitana es un simbèu qu'òm tròba dins tot le sud de França, en particular en Gasconha e en Lengadòc.

Se tròba tanben dins nombroses blasons e logòs de regions, departaments o ciutats.

Las brancas de la crotz son egalas (pr’amor d’aquò ei qualificada de crotz greca) e van en s’eslargir deu centre de cap tà l’exterior (patada). Aqueras brancas son vueitadas e coronadas de bòlas (pometas).

Existish fòrça explicacions a la significacion d’aquera crotz e las legendas costejan sovent las analisis eraldicas.

Las dotze "pometas", segon los punts de vista, an podut èster interpretats coma ua referéncia aus dotze apòstols a las dotze tribús d'Israèl... Estoc quauques còps assimilada a ua crotz solara dont las quate brancas representavan las quate sasons e cada bòla un mes d’aqueras sasons. Los dotze punts simbolizavan entà d’autes los dotze signes astrologics europèus.

Las colors sang e aur de la crotz occitana son omnipresentas dins las armas deus principaus linhatges occitans : Castilha, Navarra, Bearn, Aquitània, Anglatèrra. Aqueras colors son tanben regde presentas dins las armas de ciutats : Barcelona, Foish...

La crotz occitana es un simbèu que se pòt tanben trobar en pintrura sus granas realizacions, dins esculpturas, e dins articles mes estandardizats coma vestits e estilòs.

La crotz occitana es tanben dita crotz deu Lengadòc, crotz de Tolosa e quauques còps crotz de Provença. Ei fòrça anciana e proveng d’Orient. Òm torna trobar la sua traça en Cappadoce (Turquia), a Pisa (Italia), en Provença (Forcalquièr) o en Catalonha. Semblaré qu’estosse importada de l’èst de la Mediterranèa peus Visigòts que de 418 a 507, establishen lo son reiaume entre Aups e Pirenèus e hèn de Tolosa la sua capitala.

Las quate brancas son entà daubuns la materializacion de l’itinerari deus visigòts deus ribatges de la Mar Negra a Tolosa, peus Balcans, l’Italia e l’Espanha…

Importada de l'èst de la Mediterranèa pendent las invasions deus Visigòts, aquera crotz estoc prumèr un deus emblèmas deus comtes de Tolosa ont estoc a còps aperada "crotz d'Arlas", estoc tanben atribut deus comtes de Marselha. Es probablament, de cap a 1020, en seguida a l'union de Guilhèm III de Tolosa dambe Emma, hilha de Robaud de Provença, petita hilha de Boson rèi d'Arlas, que l'emblèma dintra dins la simbolica tolosana.

La mes anciana crotz occitana que se pòt véser auèi ei la qui ondra la pèira clau de la nau de la catedrala Sent-Estève a Tolosa, data de 1211.

Los occitanistas utilizan aquera crotz coma simbèu de raliament, li adjunhen a bèths còps ua petita estela a sèt brancas. (simbèu deu Felibritge e de la reneishença de la lenga d’Òc).

Las regions de lenga occitana tenguen auèi a includir tot o partida de la crotz occitana dins los sons logòs e blasons. De las vaths italianas a la Navèra Aquitània, de l’Auvernha-Ròse Aups a la Vath d’Aran en Espanha, la crotz occitana demòra lo simbèu de la lenga e de la cultura occitanas.

Ende construsir la crotz occitana, veser : http://www.fabricecourt.com/formation/construire-une-croix-occitane/

https://fr.wikipedia.org/wiki/Croix_occitane

http://vexil.prov.free.fr/emblemes/croix%20occitane.html

http://eraldica-occitana.over-blog.com/

http://eraldica-occitana.over-blog.com/pages/ORIGINAS_DE_LA_CROTZ_OCCITANA-8817540.html

http://eraldica-occitana.over-blog.com/pages/La_CROTZ_OCCITANA_dins_leraudica_institucionala_las_comunas_de_A_a_F-5217691.html

http://eraldica-occitana.over-blog.com/pages/La_CROTZ_OCCITANA_dins_leraudica_institucionala_las_comunas_de_G_a_Q-5245580.html

http://eraldica-occitana.over-blog.com/pages/La_CROTZ_OCCITANA_dins_leraudica_institucionala_las_comunas_de_R_a_V-5248383.html

http://eraldica-occitana.over-blog.com/pages/La_CROTZ_OCCITANA_dins_leraudica_institucionala_los_despartaments-5214893.html

Frisa cronologica

Questions

Dessenha ua crotz occitana en seguir aqueras consignas :
- Plaça un punt au centre de la huelha.
- Traça duas dretas perpendiculàrias a partir d’aqueth punt.
- Traça un cercle de 3 cm de rai a partir d’aqueth punt de despart.
- Plaça 4 punts distints A, B, C, D sus las dretas a 3,5 cm deu centre.
- Traça los cercles de centre A, B, C, D de 3,5 cm de rai.
- Tròba las extremitats vesias d’ua mèma branca. Cèrca dambe lo compas un punt a cada 3 cm d’entre eras e hè un cercle de 3 cm de rai.
- Torna hèr aquera operacion 8 còps entà hèr aparéisher ua crotz occitana.
Nòma las colors de la crotz occitana.
Dempèi quan la crotz occitana ei coneishuda ?
Cita duas vilas ont lo blason compòrta la crotz occitana.

Activitats

Coloreja la crotz occitana.
Tròba las vilas e los país importants de l'Istòria de la crotz occitana sus ua carta.