L’aiga ei pertot dins la nòsta region. Que siam au bòrd de la mar grana, pròche deus arrius en plana o en montanha, la practica d’un espòrt d’aiga viva o lo simple banh son accessibles a totes.

Fòrças activitats pòden perméter de profieitar de l’aiga a tot atge. Aquí quauquas-uas !...

Lo canoa e lo caiac

Lo canoa s’inspira de las barcas leugèras deus Indians d’America du Nord. Lo caiac ei l’eretèr de las petitas embarcacions estanchas que los inuits utilizavan entà la pesca. Entà estar plan tenguts e entà demorar a l’eishuc, la talha pòt estar sarrada dins un « cauçon ». La pagaia utilizada ei dobla. Entà la practica esportiva, utilizam un canoa-caiac. Lo gran campion locau d’aquera especialitat ei Tony Estanguet. Triple campion deu monde e triple campion olimpic, aqueth Palin a sublimat la disciplina !

Lo canoa-caiac se practica tan dins los gaves que suus lacs o la mar grana.

Lo raft

Apareishut sus las plajas normandas au moment deu desbarcament de 1944, ei en prumèr utilizat peus Americans entà devarar los arrius o los gaves. Cinc a ueit personas pòden embarcar sus un raft. L’equipatge dèu comprénguer un timonèr experimentat…ei melhor !

L’idròspid

L’idròspid, ei la nada en aigas vivas. Se practica en arriu o en gave. Ei un espòrt fòrça rapide e espectacular. Se practica dambe un flotader insubmergible, palmas, un casco e ua combinason quan l’aiga ei tròp freda. S’aquera practica existish probablament dempèi plan longtemps, estoc popularizada en França dins las annadas 1970.

Lo barrancatge

Lo barrancatge s’adreça aus bons esportius. Ei un espòrt d’endurança que consistish a devarar un arriu, o un gave, a pé o en nadar. Las empachas deven estar passadas en còrda dobla o per sauts. Aqueth espòrt se practica dambe materiau d’escalada dins fòrça massius.

Lo surf

En 1770, quan lo capitani Cook arriba sus las islas Hawaï, descobrish los prumèrs surfaires. L’ espòrt ne se desvoloparà vertaderament qu’a partir de las annadas 1920 a Hawaii e en California. L’invencion deu plastic en 1945 va balhar ua novèla vita ad aqueth espòrt qu’ei fòrça practicat sus las nòstas còstas Atlanticas. 

Lo quaitesurf o flaisurf

En American, quaite designa la sèrp-volaira. Lo quaitesurf o flaisurf ei donc ua sèrp-volaira de bèra talha associada a ua plancha de surf. Un bon vent, quauquas andadas, mèma petitas, sus un lac o a la mar grana, e qu’ei partit entà figuras espectacularas !

Lo paddle

Lo paddle o stand up paddle (lo pagaiar dret) ei l’aujòu deu surf modèrne. Aqueth espòrt ancianament practicat peus reis polinesians sus planchas de las bèras talhadas dens camas d’aubre s’ei reviscolat a Hawaii en 1940. Dempèi las annadas 60, lo paddle s’ei espandit aus Estats-Units e en Australia. En Euròpa, aquera practica ei recenta mès fòrça presada tan suus lacs e arrius qu’a la mar grana.

http://www.surfingfrance.com/

http://www.ffck.org/